Ye Kaun Sochta hai

"Ye kaun sochta hai ?

Wo bachcha jo karon ke shishe ponchtaa hai

Jo daudtaa hai jabki laal signal ya sipahi sabko rokta hai

Jiske liye ruki hui car ka khulta shisha

Kismat khulne ke samaan hai

Gaadi ponchne par us shishe me se koi chand sikke de de

Jiske dil me bus itna hi armaan hai

Jiski kismat me bus sookhi rotiyaan, fate kapade

Aur ek gandi si basti me tin ka makaan hai

Jiske liye sardi ka kambal aur baarish ki chatari 

Ye khulaa aasmaan hai;

Wo kaise din bhar me apni choti-choti aankhon ke

Bade-bade sapnon ka gala ghontaa hai?

Ye kaun sochtaa hai?

Ye kaun sochtaa hai?

Ki wo bachcha jo sadak kinaare bheekh maang raha hai,

Kisi se car aur kothi to nahi

Sirf pet bharne ko chand sikke maang raha hai

Use bhi koi shauk nahi hai

Haath failane ka

Aur har doosre-teesre aadmi se gaali khane ka

Lekin wo majboor hai

Kyunki uske ma-baap ke paas paise nahi hain

Usme aur tum-me antar bus itna hai

ki uske ma-baap, tumhare ma-baap jaise nahi hain

Tumhare school me jitni fees jaati thi

Utne rupae me to uska baap

Poore pariwar ko paalta-poshta hai

Bharat-uday to wo jaanta nahi

Lekin har surya-uday ke saath

Ek aur din ki roti ka khayaal 

Uska dimaag nochtaa hai

Ye kaun sochta hai?

Ye kaun sochta hai?

Ki Bharat-uday aur ye chamak-damak

Bus kuch unche mahalon ka drishya hai

Desh ki thodi si janata ke liye 

Ikkisavin sadi-Ujjawal bhavisya hai

Baki ka desh

Khud ko in sapnon me kahin tatoltaa hai

Desh ka kya hoga ?

Jab is desh ka yuva chand suvidhaaon ke liye

Khud ko ek andhi daud me jhonkta hai

Par ye kaun sochta hai?

Ye kaun sochta hai?"

Written by: Vikas Dwivedi

        Volunteer- Team Manorath

contact.vikas.dwivedi@gmail.com